नेपाली कांग्रेसका महामन्त्री गगन थापाले नेपालको संविधानबाट सङ्घीयता र गणतन्त्र छुट्टाउन नसकिने बताएका छन् । मङ्गलवार सङ्घीयता सबलीकरणको कसीमा प्रदेशका सवालहरू विषयक छलफल कार्यक्रममा बोल्दै महामन्त्री थापाले यस्तो बताएका हुन् ।
‘हामीले यो भन्दा अगाडिको यात्रामा सङ्घीयता नेपालमा चलाउने पनि हो, टिकाउने पनि हो, यसलाई परिणाममुखी बनाउने पनि हो । यसको विकल्प नै छैन,’ महामन्त्री थापाले भने, ‘कहीँ कतै विकल्प खोजे संविधानको विकल्प खोजे पनि हुन्छ । त्यसैले हामी जो संविधानको पक्षमा छौँ, जो सङ्घीय लोकतन्त्रात्मक संविधान भन्छौँ, यसबाट सङ्घीयता छुट्टाउन सकिन्छ न गणतन्त्र ।’
त्यस कारण यो संवैधानिक यात्रामा अर्को कुनै एडभेन्चर नगर्न गगनले प्रस्ताव गरे । उनले यसलाई सुदृढ बनाउँदै परिणाममा लैजानुपर्ने पनि बताए । ‘लैजान सकिन्छ, गर्न सकिन्छ । हामीसँग त्यो क्षमता छ भन्ने कुरा स्थापित गर्नुपर्ने छ । यसका लागि हामीसँग तीन वर्षको समय छ भन्ने बुझौँ,’ उनले भने ।
सङ्घले लामो समयमा गर्न नसकेका काम आफूहरू छोटो समयमा गर्न लागिरहेको भन्दै महामन्त्री थापाले प्रदेश र स्थानीय तहका सरकारले पनि सोहीअनुसार अघि बढ्न आग्रह गरे ।