टिकटक लाइभ बस्ने महिलाहरूसँग मिलेर पुरुषलाई ‘फिसिङ’ गर्ने र कमिसन खाने गरेको आरोपमा एक जना युवकमाथि काठमाडौँ प्रहरीले अनुसन्धान गरिरहेको छ ।
उनी हुन्, सुर्खेतको वीरेन्द्रनगर नगरपालिका–६ घर भएर टोखा स्थित ग्राण्डीमा बस्ने २९ वर्षीय रमेश थापा । उनलाई प्रहरीले असार १३ देखी हिरासतमा राखेर अनुसन्धान गरिरहेको छ । थापा असार १३ मा आफ्नो समस्या लिएर प्रहरी वृत्त बौद्धमा पुगेका थिए । उनलाई एउटा समूहले कुटपिट गरेको थियो ।
बौद्ध प्रहरीले ‘रेस्पोन्स’ नगरेको भन्दै उनी भद्रकाली स्थित जिल्ला प्रहरी परिसर काठमाडौँमा पुगे । अनुहारमा निलडाम लिएर प्रहरीकहाँ गएका थापा आफैँ अनुसन्धानको दायरमा तानिएका हुन् । टिकटकबाट आउने कमिसनमा विवाद भएपछि टिकटक लाइभ बस्ने महिलाहरूका आफन्तहरूले उनलाई कुटपिट गरेको भेटिएको अनुसन्धानमा संलग्न अधिकृतहरू बताउँछन् । तर, उनलाई कुटपिट गर्नेहरूको अहिलेसम्म पहिचान खुलेको छैन ।
टिकटकमा लाइभ बस्ने महिलाहरूलाई पुरुषहरूले स्वेच्छाले ‘क्वाइन’ हाल्ने गर्छन् । ती महिलाहरूलाई थापाले नै परिचालन गरेर सो क्वाइनबाट कमिसन लिने गरेको अनुसन्धानबाट खुलेको छ ।
अनि, लाइभ बस्ने महिला र क्वाइन हाल्नेहरूलाई थापाले टेलिग्राम ग्रुप बनाएर कुरा गराउँछन् । टेलिग्राम ग्रुपमा हुने अश्लील कुराकानीको भिडियो बनाएर उनले पुरुषलाई पठाउने र ‘बार्गेनिङ’ गर्ने गरेको जिल्ला प्रहरी परिसर काठमाडौँका एसपी अपिल बोहराले बताए । उनले भने, ‘उनले बार्गेनिङ गर्ने नियतले गुगल ड्राइभमा स्टोर गरेर राखेको भिडियोहरू पनि फेला परेको छ ।’
आरोपीले १५–२० वटा इमेल आइडी र गुगल ड्राइभमा त्यस्ता भिडियोहरू सेभ गरेर राखेका हुन् । महिला प्रयोग गरेर ‘फिसिङ’ गरेपछि भिडियो बनाएर आरोपीले ‘मिलाउँछु’ भनेर बार्गेनिङ गर्ने गरेका थिए । अनुसन्धानमा संलग्न एक जना अधिकृत भन्छन्, ‘धेरै पुरुषहरूलाई उनले रकम जम्मा गर्न भन्दै बैंक खाताको क्यूआर कोड पठाएको भेटिएको छ ।
थापाले हालसम्म बार्गेनिङ गरेर कत्ति रकम लिए भन्नेबारे प्रहरीले अनुसन्धान गरिरहेको छ । अनुसन्धानमा संलग्न अधिकृत भन्छन्, ‘उनको बैंक खाता र त्यहाँ जम्मा भएको रकमको विवरण मागेका छौँ ।’
आरोपीले ‘जांगी एप’ मार्फत पनि ग्रुप बनाएर महिलाहरूलाई अश्लील कुराकानी गर्न लगाएर भिडियो बनाउने गरेका थिए । सो ग्रुपमा आफू पनि बसेर भिडियो रेकर्ड गरेर उनले ‘बार्गेनिङ धन्दा’ चलाएका हुन् । गुगलबाट सहजै डाउनलोड गर्न सकिने जांगी एप मार्फत ग्रुप बनाउँदा प्रयोगकर्ताले एडमिनबारे सहजै थाहा पाउँदैनन् ।
आरोपी विरुद्ध प्रहरीले मुलुकी अपराध संहिता २०७४ को दफा–१२१ अनुसार अश्लील किताब र पर्चा बनाउन वा बिक्री गर्न नहुने कसुरमा अनुसन्धान गरिरहेको छ । एसपी बोहरा भन्छन्, ‘अदालतबाट म्याद लिएर अनुसन्धान गरिरहेका छौँ ।’
सामाजिक सञ्जाल टिकटक लाइभ मार्फत अश्लीलता प्रदर्शन गर्ने र अश्लील कुराकानी गर्ने महिलाहरूबारे पनि प्रहरीले अनुसन्धान गरिरहेको छ ।