बलिउड अभिनेता सलमान खानमाथि आक्रमण गर्ने प्रयासलाई मुम्बई प्रहरीले फेरि असफल बनाएको छ । पनवेलमा सलमानको कारमा आक्रमण गर्ने योजना बनाएका लरेन्स बिश्नोईको गिरोहका चार जनालाई नवी मुम्बई प्रहरीले पक्राउ गरेको हो ।
यी चारको पहिचान धनञ्जय उर्फ अजय कश्यप, गौरव भाटिया उर्फ न्हाई, वास्पी खान उर्फ वासिम चिकना र जिशान खान उर्फ जावेद खान रहेको छ । चारै जना विरुद्ध आईपीसीको धारा ११५, १२० (बी), ५०६ अन्तर्गत मुद्दा दर्ता गरिएको छ।
यी चारै जना बिश्नोई गिरोहका सदस्य हुन् । यस्तो अवस्थामा प्रहरीले लरेन्स बिश्नोई, अनमोल बिश्नोई, गोल्डी बरारलगायत १८ जनाविरुद्ध एफआईआर दर्ता गरेको छ । पाकिस्तानबाट एके–४७ लगायतका धेरै खतरनाक हतियार ल्याउने योजना रहेको प्रहरीले जनाएको छ । मिडिया रिपोर्टका अनुसार आक्रमणकारीहरूले एके–४७, एम-१६ र एके-९२ प्राप्त गर्ने प्रयास गरिरहेका थिए।
उनीहरूले फार्म हाउस र धेरै ठाउँको रेकी गरेका थिए । प्रहरीले उनीहरूको मोबाइलबाट यस्ता धेरै भिडियो पनि बरामद गरेको छ । यसअघि १४ अप्रिलमा पनि सलमान खानको बान्द्रास्थित ग्यालेक्सी अपार्टमेन्ट अगाडि गोलाबारी भएको थियो । दुई मोटरसाइकलमा आएका आक्रमणकारीले ५ राउन्ड फायर गरेका थिए ।
गोली चलाउँदा सलमान आफ्नै घरमा थिए । घटनापछि सलमानको घरबाहिर सुरक्षा बढाइएको थियो ।