भारतका रक्षा मन्त्री राजनाथ सिंहले मंगलबार चिनियाँ रक्षा मन्त्री एडमिरल डोङ जुनसँग भेट गरेका छन्।
सो भेटमा उनले वास्तविक नियन्त्रण रेखा अर्थात लाइन अफ एक्चुअल कन्ट्रोल (एलएसी) मा शान्ति र स्थिरता कायम राख्ने तथा पश्चिम एसियाको संकटसहित क्षेत्रीय सुरक्षाका विषयमा छलफल गरेका थिए।
किर्गिस्तानको बिश्केकमा जारी सांघाई सहयोग संगठन (एससीओ) का रक्षा मन्त्रीहरूको सम्मेलनका अवसरमा भएको यो भेटलाई नयाँ दिल्ली र बेइजिङबिच चिसिएको सम्बन्ध सुधारको प्रयासका रूपमा हेरिएको छ।
भेटपछि सिंहले सामाजिक सञ्जालमा लेखेका छन्, ‘बिश्केकमा एससीओ रक्षा मन्त्रीहरूको बैठकको क्रममा चीनका रक्षा मन्त्री एडमिरल डोङ जुनसँग अन्तरक्रिया गर्न पाउँदा खुशी लाग्यो।’
बैठकमा दुवै देशका मन्त्रीले सीमा क्षेत्रमा द्वन्द्व कम गर्ने र क्षेत्रीय सुरक्षाका चुनौतीहरूलाई आपसी समझदारीमा समाधान गर्नेबारे कुराकानी गरेका थिए। सम्बन्धलाई सामान्य बनाउने दिशामा यो भेटलाई एक महत्वपूर्ण कदम मानिएको छ।
