- नेपाली कांग्रेसमा अहिले स्पष्ट रूपमा तीनवटा गुट देखिएका छन्।
- शेरबहादुर देउवा, गगन-विश्वप्रकाश र शेखर कोइरालाका अलग समूह क्रियाशील छन्।
- विशेष महाधिवेशनपछि राजनीतिक समीकरण फेरिँदा यी गुटहरू सक्रिय भएका हुन्।
नेपाली कांग्रेसका स्पष्ट रूपमा ३ गुट देखा परेका छन् । गत पुसमा भएको विशेष महाविवेशनपछि कांग्रेसमा गुटको संख्या बढेको हो । विशेष महाधिवेशन हुनुभन्दा अगाडि कांग्रेसमा संस्थापन र डा शेखर कोइराला गुट थिए ।
अहिले त्यो बेलाको संस्थापन गुट निवर्तमान सभापति शेरबहादुर देउवा समूहका रूपमा गतिविधि गर्दै आएको छ । सो समूहको भेला बुधबारदेखि महाराजगञ्जस्थित स्मार्ट होटलमा जारी छ ।
विशेष महाधिवेशनबाट नेतृत्वमा आएका सभापति गगन थापा र उपसभापति विश्वप्रकाश शर्मा अहिले संस्थापनमा छन् । उनीहरूले गरेका क्रियाकलाप पार्टीका आधिकारिक गतिविधि भइरहेका छन् ।
अर्का नेता डा शेखर कोइराला पनि विशेष महाधिवेशनपछि केही समय देउवा समूहसँगै थिए । केन्द्रीय कार्यसमिति र तत्कालिन सभापति शेरबहादुर देउवासहितको अनुमतिबिना गगन थापा र विश्वप्रकाश शर्माले विशेष महाधिवेशन गरेपछि त्यसविरुद्ध निर्वाचन आयोग र सर्वोच्च अदालतमा देउवा समूहसँग डा शेखर समूह पनि गएको थियो ।
सर्वोच्च अदालतले विशेष महाधिवेशनलाई आधिकारिकता दिएपछि भने शेखरले आफ्नो पुरानो गुट व्यूताएका छन् । शेखरले आज बागमती प्रदेशका आफ्नो समूहका नेताहरूको भेला बोलाएका छन् । भेलामा कसरी अगाडि बढ्ने भन्ने विषयमा कुराकानी हुने त्यो समूहका नेता निवर्तमान सहमहामन्त्री जीवन परियारले जानकारी दिए ।
