पाल्पाको सिद्धार्थ राजमार्गका विभिन्न स्थानमा पहिरोले बाटो अवरुद्ध बनाएको छ । राजमार्गमा पहिरो खसेपछि पाल्पा–बुटवल खण्डको कालीमाटी, चर्चरे, बर्तुङु क्षेत्र अवरुद्ध छन् । बाटो खुलाउने कार्य जारी छ ।
यस्तै तानसेन–तम्घास सडकखण्डको जोर्ते, अर्गली क्षेत्रमा पहिरो खसेर सडक अवरुद्ध बनेको जिल्ला प्रहरी कार्यालय पाल्पाका सुचना अधिकारी सुगन्ध श्रेष्ठले जानकारी दिए ।
सडक अवरुद्ध बनेपछि पाल्पाबाट बुटवल जाने र बुटवलबाट पाल्पातर्फ जाने सवारीसाधन बिच बाटोमै अलपत्र छन् । कालीमाटी, चर्चरे र राम्दी क्षेत्रका सडक एकतर्फी खुलाइएको छ भने अन्य स्थानको पहिरो हटाउने कार्य पनि अँघी बढेको छ ।
पहिरोमा अलपत्र सवारी साधनहरूलाई सुरक्षित बनाउने प्रयास गरिएको र स्थानीय तहहरूसँग समन्वय गरी पहिरो पन्छाउने काम भइरहेको विपद व्यवस्थापन समितिले जनाएका छन् ।
