यमनको तट नजिकै लाल सागरमा लाइबेरियाको ध्वजाबाहक जहाज ‘इटर्निटी सी’माथि आक्रमण भएको छ ।
सो आक्रमणमा परेर चालक दलका दुई जना सदस्यको मृत्यु भएको ‘अन्तर्राष्ट्रिय समुद्री संगठन’ का लाइबेरिया प्रतिनिधिले बताए । उनका अनुसार जहाजमाथि भयानक आक्रमण भएको थियो । साना डुङ्गाहरूबाट प्रहार गरिएको रकेट–प्रोपेल्ड ग्रेनेड (आरपीजी) का कारण जहाज क्षतिग्रस्त भएको समाचारमा उल्लेख छ ।
आक्रमणपछि जहाज समुद्रमा ढल्किएको थियो । रोयटर्सका अनुसार इटर्निटी सी जहाजमा कुल २२ जना चालक दलका सदस्यहरू थिए । यीमध्ये ११ जना फिलिपिन्सका र एक जना रुसका पनि थिए । यद्यपि अहिलेसम्म कुनै पनि समूहले यस आक्रमणको जिम्मेवारी लिएको छैन ।