इलामका चिया बगानमा यस वर्षको पहिलो टिपाइ अर्थात् ‘फस्ट फ्लस’ शुरू भएको छ । जिल्लाको दक्षिणी क्षेत्रबाट यो टिपाइ शुरू भएको चिया उद्योगी शरद सुब्बाले जानकारी दिनुभयो ।
सोयाक बगानमा मात्रै पहिलो टिपाइमा झन्डै साढे दुई सय किलो चियापत्ति सङ्कलन भइसकेको उहाँले बताउनुभयो । चिया व्यवसायी जीवन पाण्डेका अनुसार फागुनको अन्तिम हप्तादेखि शुरू हुने यो टिपाइ उद्योगी र किसानका लागि वार्षिक आम्दानीको मुख्य आधार हो ।
यसरी तयार हुने चिया जर्मनी, रुस र अमेरिकासहित युरोपका विभिन्न देशमा निर्यात हुने गरेको छ । चियाको कोमल पातबाट उच्च गुणस्तरको उत्पादन हुने भएकाले अन्तरराष्ट्रिय बजारमा यसको माग पनि बढी हने गरेको व्यवसायी पाण्डेको भनाइ छ ।
किसानका लागि भने यो पहिलो टिपाइ वर्षको आशाको सुरुवात जस्तै हुने गर्छ । यसवर्ष हरियो पत्तीको मूल्य गुणस्तर अनुसार प्रतिकिलो ६५ रुपैयाँदेखि १ हजार ५ सय रुपैयाँसम्म कायम गरिएको छ ।
चालू आर्थिक वर्षमा नेपालबाट ८६ लाख ७७ हजार किलोभन्दा बढी चिया निर्यात भई २ अर्ब ३२ करोड रुपैयाँभन्दा बढी विदेशी मुद्रा आर्जन भएको तथ्याङ्कले देखाएको छ ।
