मध्यपूर्वमा जारी युद्ध १५ औं दिनमा प्रवेश गर्दा इरानका ऐतिहासिक र सांस्कृतिक सम्पदाहरूमा गम्भीर क्षति पुगेको छ।
इरानको पर्यटन मन्त्रालयले शनिबार एक प्रतिवेदन सार्वजनिक गर्दै देशभरका कम्तीमा ५६ वटा सङ्ग्रहालय र ऐतिहासिक स्थलहरू क्षतिग्रस्त भएको बताएको हो।
मन्त्रालयका अनुसार राजधानी तेहरानमा अमेरिकी र इजरायली आक्रमणका कारण युनेस्कोको विश्व सम्पदा सूचीमा रहेको गोलेस्तान दरबार प्रभावित भएको छ।
कजार वंशको निवासका रूपमा रहेको यो दरबार तेहरानकै सबैभन्दा पुरानो र महत्वपूर्ण पर्यटकीय स्थलमध्ये एक हो। स्थानीय सञ्चारमाध्यमका अनुसार तेहरानमा रहेका स्मारकहरूमा सबैभन्दा बढी क्षति रेकर्ड गरिएको छ।
युद्धको रापले मध्य इरानको इस्फहान सहरमा रहेको १७ औं शताब्दीको प्रसिद्ध नघ्स-ए जहाँ स्क्वायरलाई पनि निशाना बनाएको छ। वास्तुकलाको नमुना मानिने यस क्षेत्र क्षतिग्रस्त भएको मन्त्रालयको दाबी छ।
त्यस्तै, बुशहर प्रान्तको ऐतिहासिक सिराफ बन्दरगाहमा रहेका शताब्दीयौँ पुराना भवन र घरहरूमा पनि युद्धले चोट पुर्याएको छ।
सांस्कृतिक सम्पदाहरूको विनाशप्रति संयुक्त राष्ट्रसङ्घीय शैक्षिक, वैज्ञानिक तथा सांस्कृतिक सङ्गठन (युनेस्को) ले चिन्ता व्यक्त गरेको छ।
युनेस्कोले इरान मात्र नभई इजरायल र लेबनानका सयौँ ऐतिहासिक स्थलहरू युद्धका कारण जोखिममा परेको भन्दै चेतावनी दिएको एएफपीले उल्लेख गरेको छ।
इरानको पर्यटन मन्त्रालयले युद्धका कारण भएको क्षतिको थप विवरण सङ्कलन भइरहेको बताएको छ।
